mukhyasadṛśaḥ pratinidhiḥ. dattasya pratiniryātanaṃ pratidānam. pratinidhiviṣaye pratidānaviṣaye ca pratiḥ karmapravacanīyasaṃjño bhavati. abhimanyurarjunataḥ prati. māṣānasmai tilebhyaḥ prati yacchati.

adhiparī anarthakau 1.4.93 adhiparī śabdau anarthakau anarthāntaravācinau karmapravacanīyasaṃjñau bhavataḥ. kuto 'dhyāgacchati. kutaḥ paryāgacchati. gatyupasargasaṃjñāvādhanārthā karmapravacanīyasaṃjñā vidhīyate.

adhiparī anarthakau , 1.4.92 "anarthāntaravācinau" iti. #etenānarthāntaravācitvādanarthakādavityuktam, na tvarthābhāvāditi darśayati. yadi hravidyamānārthatvādanarthakau syātām, nirarthakamidaṃ sūtraṃ syāt. tathā hi-- karmapravacanīyasaṃjñā gatyupasargasaṃjñābādhanārthā'nena vidhīyate. na cānarthakayoradhiparyorgatyupasargasaṃjñāprāptirasti. yaṃ prati kriyāyuktāḥ prādayastaṃ prati gatyupasargasaṃjñā vidhānāt. anarthakayośca kriyāyogāsambhavāt. "kuto'dhyāgasacchati" ityādi. kuta ityāpādāne pañcamī. karmapravacīyeti 2.3.8 dvitīyā na bhavati; "upapadavibhakteḥ kārakavibhaktirbalīyasī"(cāṃ.pa.69) iti vacanāt. sūtrārambhasya tu prayojanamākhyātameva. kuta iti, kiṃśabdāt "pañcamyāstasil" 5.3.7 iti tasil, "ku tihoḥ" 7.2.104 iti kubhāvaḥ. karmapravacanīyasaṃjñayā gatyupasargasaṃjñorvādhitatvāt "gatirgatau" 8.1.70 iti nighāto na bhavati. nanu cāgacchatītyukta āgamanaṃ viśiṣṭaṃ pratīyate, adhyāgacchati, paryāgacchatīti-- adhipariyoge tvāgamanasyoparibhāvaḥ sarvatobhāvaścāvagamyata ityaparo viśeṣaḥ, tatkathamanarthāntaravācitvamanayoḥ? naitadasti; yadā tayorapyarthayoḥ prakaraṇādeḥ kutaścidavagatayoradhiparī prayujyete tadā tayoranarthāntaravācitvaṃ veditavyam. kathaṃ punaravagatārthayoḥ? naitadasti; yadā tayorapyarthayoḥ prayogaḥ, "uktārthānāmaprayogaḥ" (vyā.pa.60) iti vacanāt? satyam, avagatārthasyāpi prayogo dṛśyate, yathā-- "brāāhṛṇau dvau" iti. lokasya prayoge gurulāghavaṃ pratyanādarāt॥

pratinidhi. atreti sūtroktaviṣaye ityarthaḥ. sūtre yasmāditi ṣaṣṭha\ufffdrthe pañcamī, asmādeva nirdeśāt. `kṛṣṇasya pratinidhiḥ' iti tu `jñāpakasiddhaṃ na sarvatre'ti samādheyam. tathāca yatsambandhinī pratinidhipratidāne, tasmāt karmapravacanīyayuktātpañcamityarthaḥ phalati. pradyumnaḥ kṛṣṇātpratīti. yuddhādau pradyumnaḥ kṛṣṇanirūpitasādṛśyavānityarthaḥ. pañcamyarthaḥ sādṛśyam. pratistu taddyotakaḥ. tilebhya iti. ṛṇatvena gṛhītān tilān svarūpeṇa mūlyādyātmanā vā pratyarpayatītyarthaḥ. karmaṇi pañcamī.

adhiparī anarthakau 546, 1.4.92 adhiparī. uktasaṃjño sta iti. karmapravacanīyasaṃjñakāvityarthaḥ. kuto'dhyāgacchati, kutaḥ paryāgacchatīti. atra "kuta" ityapādānapañcamyāstasil. kasmāt pradeśādāgacchatītyarthaḥ. nanvatra adhiparyoranarthakatayā sambandhasya taddyotyatvā'bhāvena dyotyasambandhapratiyogitvarūpakarmapravacanīyayuktatvasyā'bhāvānna dvitīyāprasaktirityata āha--gatisaṃjñābādhāditi. atra "gatirgatau" ityatra padādityadhikārāt padātparatvasampattaye "kuta" ityupāttamiti bhāvaḥ. atra prabhavati parābhavati anubhavatītyādau prāderivā'rthāntaradyotakatvā'bhāve'pi dhātvarthadyotakatvamastyeva. arthāntaradyotakatvā'bhāvenā'narthakatvavyavahāraḥ. uktaṃ ca bhāṣye--"anarthāntaravācinau dhātunoktakriyāmevāhatuḥ" iti. evaṃca kriyāyogā'bhāvādgatitvasyāpi na prasaktiriti śaṅkā nirastā.

adhiparī anarthakau 490, 1.4.92 kṛto'dhyāgacchatīti. iha--prayatī, parābhavati, vṛkṣaṃ prati vidyotate ityatra prāderviśeṣadyotakatvavadadhiparyoriha viśeṣadyotakatvā'bhāvādānārthakyaṃ, dhātvarthamātradyotakatvena tvarthatā'styeveti bodhyam."gatirgatau"ityatra padādityadhikriyata iti padātparatvasaṃpattaye "kuta"ityuktam.