hīnaḥ iti nyūnaḥ ucyate, sa ca utkṛṣṭāpekṣaḥ. tena iyam hīnautkṛṣṭasambandhe saṃjñā vijñāyate. hīne dyotye ayam anuḥ karmapravacanīyasaṃjño bhavati. anu śākaṭāyanaṃ vaiyākaraṇāḥ. anvarjunaṃ yoddhāraḥ.

upo 'dhike ca 1.4.87 upaśabdaḥ adhike hīne ca dyotye karmapravacanīyasaṃjño bhavati. upa khāryaṃ droṇaḥ. upa niṣke kārṣāpaṇam. hīne upa śākaṭāyanaṃ vaiyākaraṇāḥ.

upo'dhike ca. , 1.4.86 adhikadhyārūḍhamucyate. na cānadhikena vinādhikaṃ sambhavati. tenādhike sambandhe'dhyārūḍhakriyājanite saṃjñeyaṃ vijñāyate. cakāraddhīne ca. "upakhāryāṃ droṇaḥ" iti. khāryā droṇo'dhika ityarthaḥ. "yasmādadhikam" 2.3.9 ityādinā saptamī. tayaiva sambandhasyābhihitatvāt droṇaśabdāt "karmapravacanīyayukte dvitīyā" 2.3.8 iti dvitīyā na bhavati॥

hīne. hīne dyotye iti. nikarṣe dyotye ityarthaḥ. hīna iti bhāve ktaḥ. `o hāk tyāge' iti dhātorodittvāt `oditaśce'ti niṣṭhānatvam. anuḥ prāgvaditi. kramapravacanīyasaṃjña ityarthaḥ. anu hariṃ surā iti. atra nikṛṣṭabhāvo'nudyotyā dvitīyārthaḥ. tadāha–harerhīnā ityartha iti. hareriti ṣaṣṭhī pratiyogitāyām, haripratiyogikanikarṣavanta ityarthaḥ.

upo'dhike ca 543, 1.4.86 upo'dhike ca. cakārāt "hīne" iti samuccīyate. tadāha-adhike hīne ceti. ādhikye nikarṣe cetyarthaḥ. prāksaṃjñamiti. prāguktakarmapravacanīyasaṃjñakamityarthaḥ. adhike saṃjñāvidhānaṃ na dvitīyārthamityāha-adhike saptamī vakṣyata iti "yasmādadhika"mityanena karmapravacanīyasaṃjñākāryaṃ saptamī vakṣyate ityarthaḥ. hīne iti. "udāharaṇaṃ vakṣyate" iti śeṣaḥ. upa hariṃ surā iti. harerhīnā ityarthaḥ.

hīne. utkṛṣṭādeva dvitīyā na tvapakṛṣṭāt, śaktisvabhāvadityāśayenodāharati– anu harimiti. upo'dhike ca. cakāreṇa hīne ityanukṛṣyate, tadāha–adhike hīne ceti. adhike saṃjñāvidhānaṃ na dvitīyārthamityāha–saptamī vakṣyata iti. `yasmādadhika'mityaneneti bhāvaḥ. tasminnapi sūtre `karmapravacanīyayukte'ityanuvṛtteradhike saṃjñāvidhāna māvaśyakameveti jñeyam.